HFR býður upp á æfingar fyrir götuhjól, cyclocrosshjól, fjallahjól og fulldempandihjól. Sérstakar æfingar eru fyrir unglinga U15 til U23 allt árið og sumarnámskeið fyrir börn frá 4 ára aldri. Á æfingum HFR er hópnum skipt upp eftir getu ef þurfa þykir.

ÚTIÆFINGAR

Æfingar HFR eru haldnar undir leiðsögn þjálfara eða leiðbeinanda. Þegar þurfa þykir er hópnum skiptu upp eftir getu. Á æfingum er jafnan lögð áhersla á að hita upp, taka nokkra mislanga spretti og síðan hjóla rólega í lokinn. Yfirleitt eru æfingar styttri og yfirvegaðri á haustin. Þegar líða tekur á vorið þá eykst bæði magn og vegalengd á æfingum, enda flestir að undirbúa sig fyrir hjólakeppnir á komandi sumri. Á sumrin vilja flestir reyna að bæta við sig eða halda forminu með nokkru álagi á æfingum. Allir geta verið með, því hópurinn hjólar saman á ákveðinn stað þar sem æfingin er tekin og hjólar svo saman aftur heim. Þannig fá allir sitt út úr æfingunni því uphitunina á að taka undir lægra álagi og sprettina tekur svo hver og einn á sínu álagi. Þegar farnar eru lengri leiðir á æfingum er hópnum skipt upp eftir getustigi eða að reynslumeiri og öflugri aðilar leiða hópinn í lengri tíma á meðan þeir sem nýrri eru fylgja meira með. Þannig geta hjólarar á misjöfnu getustigi hjólað saman lengri vegalengdir. Á sumrin eru flestir á götuhjólum (racer) en yfir vetrartímann eru flestir á cyclocross hjólum eða fjallahjólum.

Útiæfingar hefjast við Nauthól í Fossvogi (við bekkina).

Fjallahjólaæfingarnar (MTB) eru þrisvar sinnum í viku og hefjast við neðra bílastæðið við Perluna eða skíðalyftuna í Ártúnsholti (sjá stundatöflu).

ALL MOUNTAIN/MTB FJALLAHJÓLAÆFINGAR

Fjallahjólaæfingarnar eru þrisvar sinnum í viku, sjá forsíðu eða félags- og æfingagjöld.

Stundum er æfingunum valin önnur staðsetning en auglýst er í tímatöflunni og er það þá auglýst á facebook síðu félagsins HFR – MTB – AM – DH. Á æfingunum er lögð áhersla á tæknileg atriði, hvernig best sé að beita fjallahjólinu við mismunandi aðstæður og hvernig eigi að öðlast meira sjálfstraust við krefjandi aðstæður.

INNIÆFINGAR

Á veturna eru inniæfingar í aðstöðu félagsins hjá Veggsporti, Stórhöfða 17. Þar er boðið upp á æfingar á fullkomnum wattahjólum, IC8 og TACX, en félagið á 30 slík hjól. Einnig á félagið nokkra trainera svo þeir sem vilja geta mætt með sitt hjóli og tekið æfinguna á því. Boðið er upp á æfingar á morgnana, í hádeginu og síðdegis yfir vetrarmánuðina. Áhersla er lögð á að byggja upp þol og þrek fyrir mót og markmið sumarsins. Æfingarnar eru í umsjá leiðbeinanda eða þjálfara.

Styrktar og lyftingaæfingar

Á veturna er boðið upp á lyftinga- og styrktaræfingar í aðstöðu félagsins hjá Veggsporti, Stórhöfða 17. Lögð er áhersla á jafnvægi, hreyfiteygjur og styrktaræfingar ásamt lyftingum.

Prógrammið fyrir styrktar æfingarnar er byggt upp þannig að það styðji við hjólaæfingarnar, byggi upp styrk þannig að við fáum meiri kraft til að hjóla. Æfingarnar eru samsettar af rúlluæfingum, teygjum, ólympískum lyftingum og almennum styrktaræfingum.

Mikilvægt er að stunda styrktaræfingar allt árið um kring meðfram hjólaæfingunum til að viðhalda styrknum út í gegnum allt tímabilið. Ekki þarf að stunda margar lyftingaæfingar yfir sumarið til að viðhalda styrknum en ef þeim er alveg sleppt þá förum við að slappast og fituprósentan í líkamanum eykst sem hjálpar okkur ekki í hjólreiðunum. Ef við sinnum lyftingunum aðeins yfir sumarið, mætum einu sinni í viku eða einu sinni á tveggja vikna fresti þá viðhöldum við styrknum og mætum sterkari inn í næsta vetur. Þannig náum við fram meiri bætingu á milli ára.

Styrktar- og liðleikaæfingarnar eru alla mánudaga og miðvikudaga yfir vetrarmánuðina, september til maí loka. Tímarnir fara fram í húsi Veggsports Stórhöfða. Á sumrin eru ekki skipulagðir tímar með þjálfara en æfingaplan er í salnum og mælum við með að mætt sé einu sinni til tvisvar sinnum á viku yfir sumarið til að viðhalda styrk. Aðstaðan í Veggsport opin fyrir æfingahópana á opnunartíma Veggsports.

BÖRN OG UNGLINGAR

HFR leggur sérstaka áherslu á æfingar fyrir börn og ungmenni. Áherslan er á fjallahjól yfir vetrartímann en hægt er að velja um fjallahjóla- og götuhjólanámskeið yfir sumartímann.

SUMARNÁMSKEIÐ FYRIR BÖRN

Á sumrin stendur HFR fyrir námskeiðið í hjólreiðaþjálfun fyrir börn.

Fjallahjóla námskeið eru fyrir 7-11 ára og unglinga 12-15 ára. Á námskeiðunum er lögð áhersla á að byggja upp og viðhalda þoli og þreki, kenna almenna hjólafærni og hjólatækni með áherslu á fjallahjól. Námskeið fyrir 7 ára og eldri eru tvisvar sinnum í viku. Hópurinn hittist við Perluna á báða daga. Á vor og haust námskeiðunum eru tvær æfingar haldnar annarsstaðar og er það auglýst í upphafi hvers námskeiðs. Þátttakendur þurfa að hafa til umráða fjallahjól, hafa með sér vatn á brúsa og vera klædd í samræmi við veður hverju sinni. Athuga þarf að bremsur og gírabúnaður sé í góðu lagi.

Götuhjólanámskeið eru fyrir unglinga 10-16 ára. Æfingahópurinn hittist að jafnaði við Nauthól en stundum eru æfingarnar haldnar annars staðar. Þátttakendur þurfa að hafa til umráða götuhjól á sléttum dekkjum, hafa með sér vatn á brúsa og vera klædd í samræmi við veður hverju sinni. Athuga þarf að bremsur og gírabúnaður sé í góðu lagi.

Nánari upplýsingar um námskeiðin má finna á námskeiða síðunni.

ÆFINGAGJÖLD

Gjald til HRÍ, Hjólreiðasambands Íslands, er innifalið í ársgjaldi HFR en það er 2.500 krónur fyrir hvern félagsmann á ári.

Nánari upplýsingar veitir gjaldkeri@hfr.is.

ÆFINGAFERÐ HFR í dymbilvikunni (vikan fyrir páska)

Í dymbilviku (vikan fyrir páska) hefur HFR hefur haldið utan um skipulag vegna æfingaferðar félagsins. Venjan hefur verið að fara til Mallorka en páskana 2020 er stefnan tekin annað á Spáni. HFR hefur séð um að panta hótel sem er vel staðsett og haldið utan um skipulag hjólreiða en hver og einn hefur sjálfur séð um að koma sér á staðinn. Möguleiki er að leigja hjól á staðnum fyrir þá sem ekki vilja ferðast með eigin hjól. Daglega eru hjólaðar styttri eða lengri leiðir en Spánn býður upp á frábærar aðstæður til hjólreiða á þessum árstíma. Verð á gistingu og mat er stillt í hóf á þessum árstíma. Lagt er upp úr því í ár að bæði götuhjóla- og fjallahjólahópurinn fari saman í æfingaferð í dymbilvikunni. Það er ekki að ástæðulausu að margir mæta í þessa ferð ár eftir ár og margir mæta með alla fjölskylduna með sér. Æfingaferðin er frábær skemmtun og hjálpar mikið til við að bæta formið fyrir sumarið.